نتفق سوا

بقالى فتره وانا حاسس انى بعيد كتير عن ربنا .. ويمكن اصعب حاجه انك تبقى بعيد عن ربنا وفى نفس الوقت مش بتعمل معاصى تخليك تقف مع نفسك وترجع .. دا اللى بيسموه فتور فى العباده او المصطلح الاشهر الغفله .. ودى صعوبتها عن انك تكون بتعمل معاصى ان الواحد بعد شويه بيقرف من المعاصى وبيحس انه عاوز يرجع لربنا .. انما الغفله انت بتحس انك مش قريب من ربنا وفى نفس الوقت انك مش بتعمل معاصى فمش بتحس بالجريمه اللى انت عاملها " اللى هى بعدك عن ربنا".
الاحساس دا يمكن هو اللى مخلينى مكتبش فى المدونه هنا كتير .. بس من يومين حسيت انى عاوز اقف مع نفسى وقفه وقلت اشرككم فيها يمكن يكون حد فيكم بيعانى من نفس المشكله ويمكن تنفعه الحلول.
مش عارف انتوا عارفين الاحساس اللى انا بوصفه ولا لأ .. احساس انك بعيد عن ربنا .. وفى نفس الوقت مش حاسس انك بتعمل معاصى.
لسه بصلى .. بس الوقت اللى مش بيتصلى فى المسجد  بيتأخر الصلاه لاخر وقته وخلاص . يمكن مبقاش فى نوافل خالص بس كل دا ميندرجش تحت المعصيه.
حسيت انى بقالى كتير اوى مقرتش فى المصحف .. وحاسس ان حفظى كله اتبخر .. يومين اتحمس واراجع جزئين تلاته .. وبعيدن ارجع تانى .
حتى قرئاتى الشرعيه اندثرت تماما تقريبا
حاسس انى بعيد بس مش عارف السبب فين.
المهم امبارح اتفقت مع حد اعرفه- واحنا بنتكلم لقيته بيعانى من نفس الاعراض -  اننا ناخد بايد بعض.
اتفقنا على تلات اربع حاجات هنعملهم يمكن يكونوا بساط جدا جدا وبديهى ان الناس كلها تكون بتعملهم .. بس احنا قلنا المهم نواظب لحد ما نحس اننا قربنا من ربنا شويه وبعدين نبقى نزود.
اتفقت معاه على مراجعه كل يوم حزب قرأن " او على الاقل قرايته".
على الاقل قبل ما ننام نصلى سنه العشا والشفع والوتر.
نلحق الجماعه الاولى ونختم الصلاه وعلى الاقل فى اليوم نقلو استغفر الله العظيم 100 مره.
الحاجات اللى اتفقنا عليها صغيره اوى زى ما اتنتوا شايفين وانا عارف ان اكيد اللى بيقروا المدونه هنا على الاقل بيعملوا كده .. بس احنا اتفقنا على الحاجات دى كبدايه .
البوست دا انا كاتبه للى بيعانى من نفس الحاله اللى انا كنت بعانى منها .. لو محتاج حد يساعدك ومحتاج انك تساعد حد .. احنا ممكن ناخد بايد بعض ..ونتابع بعض عن طريق المدونه هنا .
السر اللى عاوز اقوله لكم انى حاسس بسعاده كبيره جدا انى بدأت اراجع تانى على حفظى .. وحاسس بجد رغم انه فات يوم واحد انى قربت من ربنا فى اليوم دا كتير ..
ودا يمكن مصداق لحديث الرسول صلى الله عليه وسلم عن ابى ذر رضى الله عنه قال قال رسول الله صلى الله عليه وسلم فيما يروى عن رب العزه   "من تقرب مني شبراً تقربت منه ذراعاً ومن تقرب مني ذراعاً تقربت منه باعاً ومن أتاني يمشى أتيته هرولة "  رواه مسلم
ربنا يتقبل منا ومنكم يارب ويغفر لنا ويثبتنا على الحق  واياكم اللهم امين

هناك 3 تعليقات:

TIMMY !! يقول...

السلام عليكم ,

و حمدا لله على عودتك لهذه المدونة ثانيةً ,

بالنسبة لشعورك فالواحد بيحس بيه للأسف , و زيادة !!

لكن للأسف , فعلا الواحد لوحده بيكسل , و المرء كثير بإخوانه ,

ربنا يهدينا و يوفقنا لما يحب و يرضى .

طائر الحب الحزين يقول...

السلام عليكم
اكيد الانسان اللى لسه جواه حاجة كويسة هو اللى دايما بيعرف يرجع تانى للطريق الصح ,
والمهم البداية ,والصحبة الكويسه,وأنا زيك وزى ناس كتير بأقرب وابعد ,بس كلامك شجعنى ,وهأبتدى اعمل زيك,وربنا يثبتك ويثبتنى معاك

mostafa abdulatty يقول...

سعيد بيكم