ليه اختلفوا؟؟

هو سؤال بسيط ليه الفقهاء اختلفوا؟؟
سامع حد بيقول اختلافهم رحمه
لأ انا مش مقتنع بده معلش
بصوا هقول بس مقدمه مهمه ونرجع لموضوع رحمه ولا مش رحمه
معظم الخلافات الفقهيه فيها رأى سهل ورأى اشد... صح؟؟!!
ماشى طيب لو الخلاف رحمه يبقى المفروض كلهم يتفقوا على الرأى السهل ويسبوا الاشد؟؟!! انما ده مش بيحصل
يعنى مثلا تلاقى الشافعى يقول حكم مسأله فقهيه يجى بعده الامام احمد بن حنبل ويخالفه فى الرأى ويختار الرأى الاشد
رغم انه عارف بالطبع انه بيخالف رأى الشافعى - الى هو اسهل للأمه -
طب بلاش الامام احمد ... نقول النووى - مجتهد فى مذهب الشافعى - بيخالف الشافعى برضه فى اراء ويختار ويرجح الرأى الاشد

يبقوا هم مش اختلفوا عشان يرحمونا ....
لأ هم اختلفوا لسبب تانى خالص .....
او مفهموم كلمه الرحمه مختلف من عندنا لعندهم .... يمكن يقصدوا انهم لو تركونا نعمل بالرأى الاسهل - الى هم مقتنعين انه غلط - يبقوا مش بيرحمونا ... لأ دول بيضرونا
!!
نقول ان الحكايه ببساطه ان الامام الشافعى بص فى الادله الى عنده ماشى؟؟
وبص فى اراء السلف وازاى فسروا الادله سواء قران او سنه شغال؟؟
وبعدين لانه يمتلك ادوات الاجتهاد اجتهد فى رأى وافتى بيه
وهضرب مثال هنا الى هو النقاب
الشافعى الامام يرى ان النقاب مش فرض - طبعا بعد ما جمع الادله واراء السلف واجتهد- تلاقى بعد كده الامام احمد بن حنبل - الى برضه جمع الادله واراء السلف -بيقول ان النقاب فرض وتلاقى الامام النووى- الى برضه جمع الادله وجمع اراء السلف واجتهد - بيقول ان النقاب فرض
رغم ان منطق ان الخلاف رحمه يفرض على الامام النووى والامام احمد انهم ميبقوش متشديدن فى مسأله النقاب دى خصوصا ان الشافعى الامام قال ان النقاب مش فرض فليه يتشددوا على الامه؟؟
الاجابه ببساطه ان المسأله مش مسأله هوى ولا ازاى ارحم العباد - لان ربنا ارحم بيهم - المسأله ببساطه فين الدليل ؟؟
وزى ما افهم - كامام مجتهد - هقول وغيره يبقى - من وجه نظرى- غلط حتى لو يحتمل الصواب انما غالب ظنى انه غلط

كل الحكايه دى عشان اقول حاجه عكس ما معظمكم فهم
الى عايز اقوله ان مش معنى انى اخذت الرأى الفقهى الاشد انى متشدد
.. لأ ممكن يكون لانى فاهم ان الرأى ده هو الصح
سواء بقى كنت امام مجتهد او مقلد وعامى

ومش معنى انى اخذت رأى فقهى الاسهل انى متساهل
.. لأ ممكن يكون لانى فاهم ان ده الرأى الصح

المهم اكون وانا باخد الرأى متجرد وفعلا بدور الحق فين .. الحق واحد ربنا حرم الشئ ده او حلله مينفعش عقلا يكون الشئ ده حرام وحلال فى نفس الوقت ... بس فهمنا للحق ده ايه ممكن يتعدد

طيب فى كل الاحوال انا أخذت رأى سواء السهل او الاشد امتى بقى انكر على المخالف واتهمه بالتشدد او التسيب؟؟

الاجابه بسيطه جدا ... اولا اسأل نفسى المسأله دى فيها خلاف ولا لأ؟؟
لو فيها اسأل نفسى تانى هل الخلاف فيها معتبر ولا لأ ؟؟
لو الاجابه عن السؤالين باه يبقى مليش انى انكر ولو لأ يبقى انكر بالمعروف
يعنى لو خمسه اختلفوا الظهر كام ركعه
الاول قال 1 والتانى قال 2 والتالت قال 3 والرابع قال 4 والخامس قال 5
اكيد مش الوسط اننا نقول خلاص الظهر تلاته ونبعد عن التشدد ونبعد عن التسيب
لان ببساطه الوسط
- زى ما ربنا امرنا- ان الظهر 4
ربنا حكم علينا اننا امه وسط - لو نفذنا كلام ربنا بالحرف نبقى امه وسط -
زودنا عليه - من غير دليل- نبقى متشددين ومتنطعين
قللنا منه - من غير دليل - نبقى متسيبين ومش وسط
انما لو قلنا بالدليل الى وصل لينا بفهم العلماء الى قبلينا نبقى كده الامه الوسط واختارنا الرأى الوسط حتى لو كان اشد الاقوال فى المسأله او سهل الاقوال سيان
حاجه اخيره بقى
الطبيعى اننا مأمورين بالامر بالمعروف مش النهى عن المعروف
يعنى لو واحد خد اشد الاقوال فى مسأله - لانه فهم الدليل كده- وفى نفس الوقت بيعمل اخطاء كتيره
الطبيعى اننا نأمره بانه ميخدش القول ده - الى هو مقتنع انه هو الدين - ولا اننا نقوله صلح اخطائك

مثلا واحد مقتنع ان صلاه الجماعه فرض وفى نفس الوقت قليل الادب ولسانه طويل
الناس بتشوفه رايح جاى من الجامع وبتسمع من لسانه كلام ميتقالش من راجل صايع
الطبيعى اننا نأمر الراجل ده انه يبطل يصلى فى الجامع ويصلى فى البيت وان صلاه الجماعه مستحبه مش فرض
.. ولا نقوله لأ بلاش تشتم واتقى ربنا
طب هو راجل رخم ونصحناه مليون مره انه يبطل يشتم ومش بيبطل .... نقوم نزهق ونقوله طب خلاص متجيش تصلى فى الجامع؟؟ ولا نفضل نقوله بطل تشتم وده ميلقش بخلق المسلم الى بيصلى فى الجامع؟؟
.. مش محتاج اجاوب الاجابه واضحه
حاجه بعد الاخيره
فى حاجات حرام وحلال فى الدين احنا منعرفهاش - جهل مننا بعيد عنكم - فلو لقينا واحد بيعمل حاجه من باب انها من الدين- من وجه نظره - المفروض منسخرش منها غير لما نتأكد انها مش من الدين وهو بيألف بمزاجه عشان منوقعش فى مشكله السخريه من الدين ودى مشكله كبيره اوى

هناك ٢٩ تعليقًا:

Mafrousa يقول...

صباح الخير يا بطوط
الاختلاف حيفضل ليوم القيامه و حنفضل مختلفين....لاننا بكل بساطه كل واحد بيفسر بإسلوب؟؟؟؟فيه اسلوب متشدد....
وفيه اسلوب ميسر....
المتشدد يمكن يكون تشدده خوفا من ان يقع فى خطأ ما يحاسبة عليه الله فيقول اكون فى السيف سايد احسن
اما الاسلوب الميسر فهو بيكون من منطلق ان التشدد ساعات بينفر...و همه(المفسرين)مش عاوزين الناس تنقر

وعلى حسب علمي ان الفقهاء الاربعه لم يختلفوا على (نص) و لكنهم اختلفوا فى اسلوب تنفيذه و تطبيقه

و برضه لم يختلفوا على ثوابت...

و فى الآخر عندك التفسيرين...و خد ايهما اقرب الي قلبك

استفتي قلبك

فزلوكة يقول...

بداية
بجد
أحييك على وجهة نظرك

بتهيألى مشكلتنا الحالية إن إحنا أصبحنا نتصيد الأخطاء لبعض عشان نبرر أخطاءنا إحنا
يعنى مثلا لو لقيت حد واخد بالرأى الأصعب
أقول دا متشدد عشان أبرر لنفسى إنى أخدت الرأى الأسهل
ولو لقيت حد واخد الرأى الأسهل
أقول دا متساهل فى الدين عشان أبرر لنفسى إنى أخدت الرأى المتشدد

والفكرة إنو أصلا مافيش رأى متشدد ومتساهل
لإن ممكن جدا ماأراه أنا متشدد يراه غيرى متساهل

آسفة على الإطالة
وتانى شكرا جزيلا على البوست دا

HeBa يقول...

موضوع حلو ومهم يا محمود

على حد علمي وزي ما قالت واحدة مفروسة إن الاختلاف بين الأئمة هو اختلاف في تفسير النص مش اختلاف على النص نفسه

ويمكن يرجع سبب الاختلاف لأسباب لغوية يعني مثلا يختلفوا على معني كلمة وبالتالي يختلف الحكم ما بينهم

ولاختلاف الأدلة والمعايير اللي بيعتمد عليها كل واحد فيهم

بس زي ما أنت قلت في ثوابت كلهم بيتفقوا عليها

المهم إن الحاجة اللي أنت عاوز تعملها ما تخالفش القرآن والسنة وتكون راضي من جواك عنها

وزي ما واحدة مفروسة قال

استفتي قلبك

تحياتي

Zodiac staR يقول...

that's a good point , u know we always say that the wrong solution is the hardest , and that is exactly the wrong answer , not everything is a piece of cake , otherwise we won't pray 5 prayers a day coz that's hard and the correct solution then is to pray once a day ...we have to collect evidence to prove our opinions , other wise we are wrong , coz these things can't be based on mere feeling .. what we really need here is to change the way we think , change the ways we seek to find the most perfect answer for any problem that faces us , (bas ana mafhemtesh , enta m3 wla ded el nekab??);)zodiac

Mahmoud البطراوى يقول...

واحده مفروسه

اوك انا متفق معاكى ان الائمه اختلفوا فى مفهوم نصوص بس كمان اختلفوا فى ثبوت النصوص
بمعنى ممكن يصل نفس النص لامامين ويختلفوا فى صحه النص من ضعفه وبالتالى يختلف الحكم
المهم ده مش موضوعنا اصلا

نرجع لموضوعنا
الاختلاف فى فهم النص او فى النص نتج عنه ان فى رأى اشد ورأى ايسر صح؟؟
طيب انا لو اخدت الرأى الاشد - لانه مقتنع بيه او من باب الورع - ابقى متشدد؟؟
ولو اخذت النص الايسر - مقتنع بيه برضه- ابقى متسيب ؟؟
الفكره الى بقولها ان اكيد واحد منهم صح والتانى غلط لان ربنا اما حرم الشئ ده او حلله اوك؟
طيب طالما واحد منهم بس الى صح يبقى انا لازم اخد الرأى الى اقتنع بيه - بالادله او الفهم - ومبقاش لا علىطول مع الرأى الاشد ولا على طول مع الرأى الايسر

اقولك على حاجه انا عايز اشوف رأيك فى المثال الى انا ضربته ( النقاب ) مش رأيك فيه كحلال ولا فرض لأ فى رأيك فيه ليه بن حنبل والنووى اخذوا الرأى الاشد؟؟

** ملحوظه مهمه جدا انا مش بتكلم عن نفتى الناس بإيه لاننا مش اهل فتوى انا بتكلم عن الرأى الى ناخده احنا ونقتنع بيه
----------------------------------

فزلوكه

معاكى تماما احنا لازم نبحث والرأى الى نقتنع بيه - مش بالهوى - ناخده

-----------------------------------

هبه

اولا حمد لله على السلامه

ثانيا

اختلافهم ده مبرر انى كل مره اخد الرأى الايسر واتهم غيرى بالتشدد؟؟
ولا اختلافهم ده مبرر انى اخد الرأى الاشد واتهم غيرى بالتسيب؟؟

طيب لو اجابتك على الاتينين بلأ يبقى عشان كده انا كتبت الموضوع

---------------------------------

زودياك ستار

انا معاكى فى كل حرف قلتيه

Mahmoud البطراوى يقول...

بصوا الى عايز اقوله ببساطه ان مش معنى انى اخذت رأى معين انى متشدد او متساهل

انا اخدت رأى عشان انا مقتنع ان ده الصح

طالما التزمت بالمنهج العلمى للبحث

وطريقه ان انا اخد رأى واسيب التانى هتكلم عليها ان شاء الله بعدين بس انا بتكلم عن القاعده العريضه

لو انا اخدت رأى ان الصلاه فى المسجد فرض مش شرط اكون مش بسمع اغانى مثلا
والعكس لو قلت انى مش بسمع اغانى مش شرط اكون بقول ان الصلاه فى المسجد فرض ومش من حد حق يجى يقولى يا بنى انت ازاى بتسمع اغانى - مثلا - وبتروح تصلى فى الجامع
ولا ان حد يتريق ويقول شوف الراجل الى كل وقت فى الجامع وعمال يسمع اغانى

وكمان مش شرط ان طالما فى خلاف انى اخد الاسهل وخلاص من غير ما ابحث وافهم واقتنع لو متفقين على ده يبقى كويس لو ليكم نموذج اجابه غيره قولوه

Unknown يقول...

اختلاف الفقهاء دة انا معاك فى رايك فيه وبعدين انا سمعت مقولة بتقول استفتى قلبك ولو افتوك طبعا استفت قلبك فى الاراء مش تخترع راى من عندك كدة................ المهم حلو الموضوع و وضح حاجات شكرا يا دكتور

غير معرف يقول...

ربنا حكم علينا اننا امه وسط - لو نفذنا كلام ربنا بالحرف نبقى امه وسط -
زودنا عليه - من غير دليل- نبقى متشددين ومتنطعين
قللنا منه - من غير دليل - نبقى متسيبين ومش وسط


ادى الخلاصه وانت قلتها فى موضوعك.... اظن احنا كده متفقين؟؟؟


روز

Mafrousa يقول...

يعني انا ماطه الموضوع ده بالقصد
تقوم انت مرجعني ليه تاني

رأي فى الموضوع ده مش حيعجب...فجنبني التحدث عنه

ربنا مدينا عقل نفكر و نقلب الكلام و نعقله....
ولو لسه عاوز مش رأي بقى حسميها وجهة نظري فى الموضوع ده و رؤيتي الخاصة انا ممكن ابعتلك بيه ميل

لكن كده على الملأ......لا اعتقد

NilE_QueeN يقول...

بص بقي

الاختلاف سنة الحياه
و زى ما هو واضح ان اختلف الفقهاء ف مسائل موردش فيها نص صريح ومباشر

انت ضربت اكتر من مثل

مثلا النقاب اللى قال انه فرض و اللى قال انه سنه والموضوع متعداش كده
مجاش حد قال انه بدعه
وفى شروط معروفه لحجاب المرأه المسلمه انا حجتي الشخصيه فا انه مش فرض ان اللبس اللى الواحده تقف بيه قدام ربنا هو اللبس اللى الناس تشوفها بيه لان الله احق ان يستحي منه
واللى قالوا انه فرض فسروا نفس ايات الحجاب تفسير يشير لان حجاب المسلمه المعتد بيه هو النقاب

واللى تلبس النقاب لها كل الاحترام والتقدير واللى مش لابساه لها احترام وتقدير على قدر دينها واخلاقها مش لبسها بردوا

مظنش ان حد اختلف على عدد الفروض ولا عدد الركعات ولا شيء من المصحف ولا مناسك الحج

وهديك من عندي مثال

معروف ان نمص الحواجب حرام لحديث الرسول (لعن الله النامصه والمتنمصه ...لاخره )

فى شيوخ قالوا ان الشعر ما بين الحاجبين من الحاجب احتياطا وقالوا مايتشلش
وفى قالوا انه من الوجه ويجوز يتشال
وحكمة ربنا فى عدم نمص الحواجب حكمه صحيه وادبيه ولربنا حكمته ف كل شيء
غير ان نمص الحاجب بيغير شكل الوش الى حد كبير
فا شعر الحواجب دا متصل بنهايات عصبيه لما بيتشال الخلايا المتصل بيها بتموت

فى حاجه اسمها التشقير طالعه موضه من فتره الستات بيفتحوا جزء من حواجبهم فا لون شعر الجزء دا بيختفي وشكل الحاجب بيتغير فى شيوخ قالوا عادى مش مشكله وفى قالوا لاء وحذروا من دا وانا نفسي شايفه ان التصرف دا فيه تحايل على شرع ربنا

عن نفسي اخدت بالرئي اللى يقول ان الشعر ما بين الحاجبين يتشال لانه مش من الحاجب ورافضه فكرة التشقير دى تماما

سيدنا محمد (صلى الله عليه وسلم)قال ..الحلال بين والحرام بين وبينهما امور مشتبهات فمن اتقي الشبهات فقد استبرء لدينه وعرضه. او كما قال عليه الصلاة والسلام

احكام الامور بتنقسم الى حلال ومستحب وجائز ومكروه وحرام والعلماء بيقولوا اللى يعمل المكروه بيكون قرب من الحرام و النفس البشريه اماره بالسوء

فى اسئله ملهاش اجابه لان اجابات كتير بتكون صح
فا دا شيء لا يستدعي التركيز عليه

غير معرف يقول...

بص يا باشمهندس

اولا مفتقدة كتاباتك اوى ... سبحان الله انا لما رجعت كنت بدور على ناس معينة عشان اقرالهم

لكن موضوع الاختلاف دا انا بفكر فيه بطريقة تانية .. انا معاك انو مش معنى اننا نكون وسطيين , اننا ناخد ال mean average بتاع الفتاوى .. زى مثال صلاة الظهر اللى حضرتك قولته


بس موضوع اختلافهم رحمة معناه .. انهم كلهم مختلفين , و فى نفس الوقت كلهم صح... يعنى لو انا بتبع الامام الفلانى مش معنى كدة انى متشددة او متسيبة .. المهم انى اتبعه فى كل الفتاوى .. مش اخد من الامام الفلانى الفتوى اللى عاجبانى و الاقى رايه مش عاجبنى فى فتوى تانية اروح متبعة امام تانى حسب مزاجى ... لان دا نفاق

دى اول حاجة

تانى حاجة .. لما كنت بقولك ان كلهم مختلفين و فى نفس الوقت كلهم صح .. فدا لان الفتوى بعينها ممكن تكون حرام لحد و حلال لحد تانى ... زى مثلا موضوع المصافحة باليد بين الرجل و المرأة .. الامام ابو حنيفة قال انو مش حرام و فى نفس الوقت الامام احد بن حنبل قال انو حرام ... فلما نيجى نطبق الموضوع دا فهيكون حسب ظروف كل واحد ..لان راى الامامين صح

يعنى مثلا لو واحد بيحس بالفتنة من المصافحة .. او مثلا مجرد اللمس بيسسب له اثارة ..ففى الحالة دى المصافحة تكون حرام .. لكن لو واحد بيسلم عادى و المصافحة مش فارقة معاه فى حاجة ,فساعتها نقوله اتبع راى الامام ابن حنبل مفيش مشاكل...

فملخص الكلام .. ان الموضوع راجع للامام المتبع و اخلاص الفرد وظروف المجتمع اللى هاتطبق فيه الفتوى .. و هنا يجي دور الفقه المقارن

و قيس على كدة حاجات كتييييير مختلف عليها

على فكرة .. مش اسفة للاطالة

و شكرآ

عبده الرايق يقول...

الاختلاف سيظل قائما مدى الحياه
فلا اظن ان هناك اتفاق بين الانسان بعضه البعض من قديم الازل
فى الدين الاسلامى
واليهودى والمسيحى وفى كل الاديان
وحتى خارج الاديان فى الحياه واراء اختلف الناس بعضهم البعض
اما ثوابت الدين ونصوص القرأن الكريم فلا خلاف فيها

رئـــــيسـة حزب الأحلام يقول...

انا فى رأيى الاختلاف رحمه
لانه بيشد من ازر الدين يسر
فدائما مانبحث عن الايسر ونتبعة
اما ان كان هناك راى واحد تخيل معى كيف يكون الحال
تحياتى

Mahmoud البطراوى يقول...

د انجى

استفت قلبك وان افتوك وافتوك وافتوك حديث يس البعض بيفهمه غلط

استفت قلبك بعد ما تعرف النصوص ورارء الائمه والاثم ما حاك فى صدرك وخفت ان يطلع عليه الناس

مجيش انا كده من دماغى واعمل حاجه واقول انا استفتيت قلبى طب يبقى ايه فايده نزول القران والسنه وايه فايده وجود العلماء

تحياتى يا دكتره

-------------------------------

روز

يا ريت نكون متفقين - كلنا - على ده

-------------------------------

واحده مفروسه

انتظر الميل

-------------------------------

نيل كوين

انا متفق معاكى فى كل حرف قلتيه
وسبحان الله حتى ترجيحك للموضوعين انا متفق برضه معاكى فيه

تحياتى

-------------------------------

هيليوم

مختلفين وفى نفس الوقت كلهم صح؟؟ ازاى؟؟
خلينا نقول مختلفين انما مش عارفين مين صح تبقى اكتر منطقيه لان مستحيل الشئ وعكسه يبقوا صح

كويس اوى حكايه انك تثبتى شيخ انا متفق معاكى فى ده

موضوع مصافحه المراه العبره فيها بالنص والى وصل له النص - ابن حنبل - حجه على الى موصلش له النص - ابو حنيفه - ورأى الامامين مينفعش يبقى صح لو ده كان فهم الامام احمد بن حنبل فى موضوع للخلاف كتيره اختار فيها الرأى الاشد مكنش اختار الاشد اظن دى واضحه اوى

( ** مفيش راجل هيقولك انا بحس بفتنه لما بسلم على واحده انا عارف كلام الرجاله وصدقينى نص الرجاله هيقولك ولا لما ببوسها)

نورتينى
-------------------------------

عبده الرايق

طالما الخلاف قائم وسيظل يبقى نبعد عن اتهام بعض بالتشدد والتسيب صح؟؟
طالما انا اتبعت المنهج السليم فى البحث

------------------------------

رئيسه حزب الاحلام

لو كان الامام احمد بن حنبل مثلا او الشافعى فاهم فهمك ده
طب ليه رجحوا الرأى الاشد فى بعض الامور؟؟
سؤال يحتاج الى جواب او اجابتك تحتاج للتغيير

Abo 7anf يقول...

السلام عليكم
زى مكل الفوق قالوا ان الاختلاف لازم يكون موجود
مش فى الدين بس لا فى كل حاجه
والا كانت حاتنا وقفت عند راى معين
وكل شى حتى الاختراعات نتجت ان الناس اختلفت اراها
بس اهم حاجه لما نعبر عن راينا حتى فى الخلاف يبقى فى ادب
و فى حدود
و بعدين مساله النقاب طالما البيريتدى النقاب ملتزم بيه فاهلا
لانوا لو مش فرض
فهو مش غلط

Ghada , Rofayda يقول...

اولا....
اختلاف العلماء رحمه للعامه لكن هم مش بيختلفوا علشان يرحموا الناي
بمعنى ان الرحمه نتيجه للاختلاف مش سبب....
ثانيا....
لا اختلاف على نص...
ثالثا....
انا اتبع اي رأي من ارائهم؟...
استفتى قلبك ولو افتاك الناس وافتوك
واختار اللي انا شايفه صح بغض النظر هو الصعب ولا السهل
رابعا....
سياستي مع المخالف....نتعاون فيما اتفقنا عليه ويعذر بعضنا بعضا فيما اختلفنا فيه ويكفي ان نتحد على لا اله الا الله محمد رسول الله...
خامسا....
نظرتي لمن يجهل الدين او بعض جزئياته او المذنب هي نظرة اشفاق ورحمة...لا تعالي واحتقار...

سادسا...
انا آسفه جداااااا على الاطاله

تحيااااااتي

دمت بخير.....

ست البيت يقول...

د.بطوط ،،
اتفق معاك في حاجات كتير قوي...
1- عندك حق قوي في اننا لما نشوف حد بعمل حاجة مش عارفينها منسخرش منه.. يعني اللي مربي لحية أنت مالك بتتأريش عليه ليه؟زمان كن بنألس على المنتقبات وعرفنا بعد كده أنه ممكن يكون فرض...
2- الاختلاف شر كل الشر مش رحمة ...يعني ما ينفعش يكون اختلاف الامة رحمة واللإماما بيقول في الصلاة.. ل تختلفوا فيخلف الله بين قلوبكم ،،صححها لوا غلط،،،
وبعدين نقول رحمة لأ اختلاف الأمة اجتهاد...يوضح قول الله في كثير من الآيات أفلا تعقلون...أفلا يتدبرون...
نوع من إعمال العقل على قدر العلم ..
ولأنهم علماء فجاز لهم أن يختلفوا في الفرووووووووووووووووووووووع
وليس الأصول سيدي
نحن نعبد إله واحد ونصوم شهر واحد ونصلي لقبلة واحدة ونزكي بنصاب واحد..ونصلي لرب واحد
أما الفروع فيجوز الاختلاف في فهمها
وهذا كان حال الصحابة أيضا
ثم إن أدل قصة هي صلاة العصر في بني قريظة ... الفريقين اختلفوا ولم يرتكبوا إثم
ليتنا نتفهم أصول الخلاف وأدب الخلاف
شكرا بطوط لمست وتر حساس ...

Mahmoud البطراوى يقول...

ابو حنف

مفيش مشكله خالص المشكله ان الناس تتهم بعض بالتعصب والتشدد عشان مجرد انها مقتنعه برأى تانى

رغم ان فى خلاف


--------------------------

غاده ورفيده

ثالثا....
انا اتبع اي رأي من ارائهم؟...
استفتى قلبك ولو افتاك الناس وافتوك
واختار اللي انا شايفه صح بغض النظر هو الصعب ولا السهل

النقطه دى متفقين عليها جدا

والى بعدها على حسب الظروف وطبيعه الخلاف

نورتني وشكراا لوجه نظرك
--------------------------
ست البيت

كلامك فى الجون

أبوعبيده يقول...

سلام عليكم
ازيك يا بطوط بيه. موضوعك متميز
بس فى مشكله بتواجهك .
وهى ان اللى بيعلقولك على الموضوع فاهمين مسأله الاختلاف بين الفقهاء بمزاجهم مش على درايه وعلم وده بكل صراحه يعنى شغل كوسه .
........ أ.ب . احترام للعقل......
تجيبلى دليل على كل كلمه فى الدين وانا اعتقد بكل معانى الاعتقاد التى لا تقبل التردد ان كل كلمه عليها دليل.
قال تعالى( فأن تنازعتم فى شىء فردوه الى الله والرسول)
الامام الشافعى وابن حنبل وغيرهم من الافاضل مش بيتكلم بهوى نفس وبمزاجه وترجيحه مش على اساس وجهه نظر خاصه بيه.
ومش معنى كده ان كل الاراء بتاعتهم صح وانا أختار المناسب . لأ العبره بالدليل.
الامام ابو حنيفه اخطا فى مسال كبيره زى زواج المرأه بغير ولى. والحديث بيناقض الكلام ده من اساسه.
قال رسول الله ( أيما أمراه أنكحت نفسها بغير أذن وليها فنكا حها باطل .... الحديث)
نفهم من كده ان الامام ابو حنيفه مش عالم ورجل يتبع الهوى... لأ... بس الامام لم يكن من اهل الحديث وعشان وكان أكثر فقهه اسنباطات..
بالتدرج مع العلماء على مر العصور السنه اتجمعت والاثار عن الصحابه . وخلاص معدش فى مشكله وقت الاختلاف عشان هنرجع للاثار والاحاديث ونربط مابينهم وتتحل المشكله.
ومعدش حد له حجه فى حكايه الاخذ بفتوى عالم دون أخر... ألا فى مسائل بتتعلق بفهم الدليل بين العلماء.
وفكده كمان المفروض نرجع لفهم الصحابه والتابعين واتباعهم لأ ن الخيريه كلها كانت فى القرون الثلاثه الأول بنص الحديث الصحيح( خير الناس قرنى ثم الذين يلونهم ثم الذين يلونهم). وكمان الناس دى كانوا هما المعاصرين للنبى صلى الله عليه وسلم واقرب الناس للشرع والتشريع وفهم الادله كما أادها الله ورسوله.
فمينفعش ان انا اخد بفتوى عالم عشان مش اكتر انها مريحانى وارجع كل شىء للخلاف بين العلماء..
الدين يسر . ياشيخ . متعقدهاش كده
الكلام ده كلام جهلاء نجيب دليل على كل كلمه فى دينا عشان منبقاش زى النصارى اللى بيتعبدوا بالجهل المركب .
خلاصه الكلام
يقول الحق تبارك وتعالى ( قل اطيعوا الله والرسول.... الأيه)
يقول النبى صلى الله عليه وسلم ( عليكم بسنتى وسنه الخلفاء الراشدين المهديين من بعدى عضوا عليها بالنواجذ واياكم ومحدثات الامور فأن كل محثه بدع وكل بدعه ضلاله وكل ضلاله فى النار)
علينا بالكتاب والسنه بفهم الصحابه رضى الله عنهم وأرضاهم
ياجماعه ياشباب يا اجدع ناس احنا ليه فى كل شىء بنعرف وبنحاول نعرف
وعند الدين جهلاء وأميين .
نفسى نعمل مشروع اسمه.......
.....محو الاميه الدينيه.............

Mahmoud البطراوى يقول...

ابو عبيده

اولا احب احييك على كلامك الى فوق الرائع والى انا كنت ناوى اتطرق له ان شاء الله ودام

انا موافقك طبعا على كل كلمه

وخصوصا من اول
يقول الحق تبارك وتعالى ( قل اطيعوا الله والرسول.... الأيه)
يقول النبى صلى الله عليه وسلم ( عليكم بسنتى وسنه الخلفاء الراشدين المهديين من بعدى عضوا عليها بالنواجذ واياكم ومحدثات الامور فأن كل محثه بدع وكل بدعه ضلاله وكل ضلاله فى النار)
علينا بالكتاب والسنه بفهم الصحابه رضى الله عنهم وأرضاهم

جزاك الله خيرا وللموضوع بقيه ان شاء الله فالمدونه دى ماشيه على استراتيجيه فى دماغى

حسن حنفى يقول...

بوست مميز وجميييييييييييل
ربنا يباركلك
تقبل مروري
وياريت تشرفني في مدونتي المتواضعه

محاولة لكسر الصمت يقول...

عفوا.......أنا عايزة اقول حاجة ..هو فعلا اختلافهم رحمة.بس ده مش سبب اختلافهم.ده نتيجة لاختلافهم......اما سبب الاختلاف فزي ما قلت ان كل امام اجتهد وحاول وجمع احاديث واقوال ومواقف كتير وحكم في النهاية بعقله وكده طبيعي يكون فيه اختلاف...

أما عن موضوع الراجل اللي بيصلي جماعة بس بيتصرف تصرفات سيئة فبجد الموضوع ده عجبني اوي لاني شايفة ناسكتير بتخلط الامور في الحياة عموما وفي الدين خصوصا.يعني لو واحد بيعمل حاجة كويسة وحاجة وحشة نقوله لا مدام بتعمل الوحش يبقة ما تعملش الكويس.......طيب يرضي مين ده...مش عارفة الناس بتفكر كده ليه....يعني انا مثلا اعرف شخص بيتعامل مع اخواته بشدة شوية لكن هو داما بيشترك في جمعيات لمساعدة الايتام وكده.والده باه بيقوله لو مش هتعامل اخواتك كويس يبقى ما تروحش تساعد ناس تانية.طيب وليه ما اقولوش اعمل الاتنين......بجد حاجة غريبة...

مدحت محمد يقول...

ولو شاء الله لجعل الناس امة واحدة ولا يزالو مختلفين

بس هو الاختلاف رحمة لما يكون بين علماء

مش اتنين بيبيعو بطاطا فى الشارع

بيبقى اختلاف ليه معنى

marco يقول...

gooooood

r يقول...

شوف بالرغم ان الواحد طبعا يحب يعلرف رأى الفقهاء
بس انا دايما بمشى بجمله استفتى قلبك ولو افتوك
والحاجه الغلط هتكون عارفها على الاقل فى نفسك
بس عدم معرفتنا النهائيه بيها صح ومع الدين ولا لأ
تحتاج سؤالنا عليها من مفتى وعشره وفى الاخر بردوا بمشى باللى يريح ضميرى
واختلاف الفقهاء انا شيفاها نعمه فعلا
لان الدين يسر مش عسر

Mahmoud البطراوى يقول...

دواير

كلامك بجد عجبنى جداا وهو عين العكلام الى انا بلفى فى (دوايره ) من الصبح
:D
اسعدتنى زيارك جدا
----------------------------------------------

مدحت محمد

يتقوف على معنى كلمه رحمه؟؟
يعنى كلهم صح؟؟
لو كده انا مش موافق

-----------------------------------------
بسنت

استفتى قلبك ولو افتوك وافتوك وافتوك
من غير نظر للدليل؟؟
من غير نظر لاراء الفقهاء؟؟
لو بكده يبقى اتباع للهوى

يلزمنا حاجه من اتنين
اما نكون جاهلين بالدين تماما فاحنا نسأل ونقلد سواء عالم واحد او كذا عالم وناخد الاكثريه
او احنا بنقدر نفهم الادله نقوم نشوف اراء العلماء فى فهمهم للادله دى
وناخد الى نظن ان معه الدليل
اكتر من كده اخاف يكون هوى

نوريتنى بالزياره

Dr ayman يقول...

ياريت حضرتك تزور الفهرس تانى للاهميه

اتمنى منكم الدعم للموضوع

http://kinawy.blogspot.com/2008/08/blog-post_11.html

ابو درويش يقول...

دى اول زياره ليه
مدونه جميله ودمها زى الشربات

السلام عليكم
تحياتى
احمد

هبة النيــل يقول...

هو رحمة يا فندم يمكن علشان يختار كل واحد اللي يريحه من آرائهم

وسبحان الله

سيدنا رسول الله قال "استفتِ قلبك وإن أفتوك"

وكأنه يعلم بهذا الاختلاف قبل وجوده

فعلا "ولا ينطق عن الهوى"

سعدت جدااااااااا بمدونتك يا فندم

ربنا يجعلها في ميزان حسناتكم